KANDORO AZINDUA TAWI LA BENKI YA NMB MLOWO MBOZI

Mkuu wa Mkoa wa Mbeya Abbas Kandoro akizungumza katika hafla ya uzinduzi wa Benki ya NMB Tawi la Mlowo wilayani Mbozi.

Meneja wa Benki ya NMB Kanda ya Nyanda za juu kusini, Lucresia Makiriye akitoa taarifa ya ukarabati wa matawi ya benki hiyo wakati wa sherehe za kuzindua tawi la Mlowo

Meneja wa Benki ya NMB Tawi la Mlowo Hemedi Risasi akitoa utambulisho katika hafla ya uzinduzi wa Tawi hilo

Mkuu wa Mkoa wa Mbeya Abbas Kandoro akifurahia jambo na Meneja wa NMB Kanda Lucresia Makiriye alipokuwa akizindua rasmi Tawi la NMB Mlowo.

Mkuu wa Mkoa wa Mbeya Abbas Kandoro akikata utepe kuashiria uzinduzi wa benki ya NMB Tawi la Mlowo.

Meneja wa NMB Kanda ya Nyanda za juu kusini, Lucresia Makirie akitoa maelezo kwa Mkuu wa Mkoa wa Mbeya

Mkuu wa Mkoa wa Mbeya Abbas Kandoro akiwa katika picha ya pamoja na watumishi wa benki ya NMB.

Wateja wa Benki ya NMB Tawi la Mlowo wakifuatilia sherehe za uzinduzi wa tawi hilo

Watumishi wa Benki ya NMB Tawi la Mlowo na ofisi ya kanda  wakifuatilia sherehe za uzinduzi wa tawi hilo.

 

MKUU wa Mkoa wa Mbeya, Abbas Kandoro ametoa wito kwa Wafanyabiashara kuacha tabia ya kuhifadhi fedha ndani na madukani mwao na badala yake wajenge utamaduni wa kutunza benki.

 

Kandoro alitoa wito huo  alipokuwa mgeni rasmi katika hafla ya uzinduzi wa Benki ya NMB Tawi la Mlowo  lililopo wilayani Mbozi Mkoa wa Mbeya ambapo alisema tabia ya kuhifadhi fedha majumbani na madukani inahatarisha maisha ya mfanyabiashara.

 

Alisema wapo wafanyabiashara wengi ambao huvamiwa na majambazi kutokana na kutokuwa na historia ya kupeleka fedha benki hivyo kufanya kufuatiliwa kwa ukaribu na baadaye kuporwa hivyo kurudisha nyuma ukuaji wa uchumi.

 

“Zipo baadhi ya tabia za Wafanyabiashara kuchimbia fedha ndani ya nyumba zetu na dukani eti raha yako ni kuziona zikiongezeka lakini unasahau kuwa unahatarisha maisha kwa kuwavutia majambazi ambao wanazitamani fedha hizo ebu kuweni na utaratibu wa kuhifadhi kwenye mabenki” alishauri Kandoro.

 

Aliongeza kuwa mbali na kuhatarisha maisha kutokana na kuhifadhi fedha mahala pasipokuwa salama pia kuna majanga ya moto ambayo hutokea bila taarifa hivyo mfanyabiashara kushindwa kabisa kuokoa kitu chochote zikiwemo za mtaji.

 

Mkuu huyo wa Mkoa alisema wafanyabiashara wakiwa na mazoea ya kutumia mabenki pia itarahisisha upatikanaji wa mikopo mikubwa ambayo endapo watakuwa wakirejesha kwa wakati kero ya Riba kubwa inaweza kuondolewa na hatimaye biashara na hali ya uchumi inaweza kukua.

 

Awali akimkaribisha Mkuu wa Mkoa kuzindua Tawi hilo, Meneja wa NMB Kanda ya Nyanda za Juu kusini, Lucresia Makiriye alisema uzinduzi na uanzishwaji wa tawi hilo umetokana na mwamko wa wafanyabiashara kutumia benki hiyo kuhifadhi fedha pamoja na kasi ya ukuaji wa mji wa Mlowo.

 

Alisema mbali na kukua kwa  kasi yamaendeleo ya mji wa Mlowo pia ni utaratibu wa Benki hiyo kuhakikisha inatanua matawi yake ili kuwafikia wateja walipo kulingana na kauli mbiu ya Karibu yako ili wateja wengi zaidi waweze kufikiwa na huduma.

 

Aliongeza kuwa pamoja na kufungua tawi hilo pia Benki inautaratibu wa kutenga asilimia moja ya faida kwa ajili ya shughuli za maendeleo katika jamii ambapo tayari imetoa msaada wa madawati kwa Shule za msingi za Itete na Mlowo yenye thamani ya shilingi Milioni 10.