UMOJA WA WAFANYABIASHARA NDOGONDOGO MINADANI MBEYA (UWABINDOMI) WAOMBA KUSAIDIWA.

Amon Mwamtobe ni Mwenyekiti wa Umoja wa wafanyabiashara ndogondogo minadani akiongea na waandishi wa habari ambao hawapo pichani

Baadhi ya viongozi wa umoja huo walioandamana na mwenyekiti huyo

Hii ni hati ya usajiri wa chama chao

Moja ya majukumu ya umoja huo kusimamia upakiaji wa mizigo na wafanyabiashara wanaoenda mnadani kama mnavyoona kwenye picha hiyo hapo juu
...............................................

UMOJA wa wafanyabiashara ndogondogo minadani Mbeya (UWABINDOMI) wanaziomba taasisi mbali mbali ndani na nje ya Mkoa wa Mbeya kuwasaidia kuwapa usafiri.

Wafanyabiashara hao wapatao zaidi ya 10,000 kutoka Kanda za Chunya, Mbarali, Mbozi na Sumbawanga wamesema huduma zao ni kupeleka bidhaa vijijini kwa njia za minada kutokana na baadhi ya maeneo kutofikiwa na wafanyabiashara wenye maduka.

Wakizungumza na waandishi wa habari hivi karibuni, baadhi ya viongozi wa Umoja huo walisema umoja wao umesahauliwa tofauti na vyama vingine ili hali wao wamekusanya kundi kubwa la watu.

Walisema kundi wanaloshughulika nalo ni kubwa ambalo lingeachwa lingekuwa chanzo cha kukithiri kwa uhalifu katika majumba ya watu lakini wameweza kuwakusanya na kusafiri nao minadani.

Amon Mwamtobe ni Mwenyekiti wa Umoja huo anasema tangu kuanzishwa kwa umoja huo hali ya uhalifu imepungua kutokana na kuwakusanya wafanyabiashara ndogo ndogo kama vile Machinga ambao wamekuwa wakinyanyaswa mijini.

Alisema watu wengi hawautambui umoja huo ambao upo kisheria na kusajiliwa kwa namba SA 17148 na Wizara ya Mambo ya Ndani ya nchi hivyo wametoa wito kwa Serikali na watu binafsi kuona haja ya kuwasaidia kwa hali na mali.

Alisema changamoto kubwa inayowakabili ni ukosefu wa usafiri wa magari ya kupeleka bidhaa minadani kutokana na wingi wa wafanyabiashara na bidhaa wanazobeba.

Alisema asilimia kubwa ya wafanyabiashara hao mitaji yao ni midogo hivyo kushindwa kumudu gharama za kukodi magari kwa ajili ya kwenda vijijini kufanya minada ya biashara zao.

Mwamtobe alisema ni vema kama Serikali  ama taasisi yoyote yenye uwezo wa kuwasaidia magari ya mizigo au kuwakopesha ili waweze kulipa taratibu wakafanya hivyo ili kuikomboa jamii iliyoko pembezoni kutokana na kutofikiwa na bidhaa mbali mbali.

Alisema wananchi vijijini wameshazoea kupata mahitaji yao kutoka minadani kutokana na kutokuwa na maduka pia umbali uliopo kutoka vijijini hadi kuyafikia maduka yaliyoko mjini ili kununua mahitaji ya kila siku.

Alisema Umoja wao unauwezo wa kulipa gharama za gari kidogo kidogo  endapo watapa mdhamini atakayeweza kuwaunganisha na wafanyabiashara wakubwa wanaouza magari.

Kwa atakayeguswa na mahitaji ya umoja huu anaweza kuwasiliana na Mwenyekiti kwa namba 0757 354326 kwa ajili ya msaada wa kupata magari ya kusafirishia bidhaa kupeleka minadani.

Na Mbeya yetu