Wauawa kwa Kuchomwa moto baada ya kuiba Jenereta

Na Esther Macha, Mbeya

WATU wawili wakazi  wa kijiji cha Italazya  kata ya Ilembo  Wilaya ya Mbeya wameuwawa kikatili kwa kuchomwa moto na wananchi wenye hasira kali baada ya kuiba Jenereta  lenye thamani ya sh. 150,000.

 

Imeelezwa kuwa  vijana hao ambao ni wezi sugu waliiba jenereta hilo  june 18 mwaka huu majira ya saa 11 alfajiri katika kijiji cha Italazya baada ya kuboa nyumba ya Mkazi wa kijiji hicho aitwaye Hyera Kanani  na kufanikiwa kuiba Jenereta hilo.

 

   Mwenyekiti wa Kijiji cha Italazya Bw. Aloni Omary  alisema  kwamba watuhumiwa baada ya kuiba jenereta hilo walikamatwa na mwenye  mali  ambapo alipiga kelele za kuomba msaada kwa majirani na hivyo kujitokeza  wananchi na kuanza kuwashambulia .

 

Alisema  kuwa  baada  ya mwenyekiti kuzidiwa nguvu na wananchi  hao waliendelea kuwapiga  kisha kuwachoma moto watuhumiwa hao kisha wananchi kutokomea kusikojulikana.

 

Aidha  Mwenyekiti huo aliwataja wezi waliochomwa moto na  wananchi kuwa  ni Frank Jonas (26), Fikiria Lyarambo(33) wote wakazi wa  kijiji cja Itarazya kata ya Ilembo wilayani Mbeya.

 

Alisema kuwa katika kijiji cha Italazya kumekuwepo na wimbi kubwa la ujambazi kiasi kwamba kuwafanya wananchi waishi bila amani kijijini hapo   , na kuwa hata vijana waliochomwa moto wamekuwa wakihusishwa katika matukio kadhaa Wilayani Mbozi.

 

Akithibitisha tukio hilo  Kaimu Kamanda wa Polisi Mkoani Mbeya  Bw.Anecletus Malindisa alisema jeshi la polisi linafanya uchunguzi wa tukio hilo  ili sheria iweze kuchukua mkondo wake.