WANAKIJIJI WANYANG'ANYWA MRADI WA KIWANDA ILUNDO KIWIRA

 WAKAZI wa kijiji cha Ilundo kata ya Kiwira wilayani Rungwe sasa

watajilaumu kwa kuukosa mradi mkubwa wa kiwanda cha matunda kufuatia

vurugu walizozifanya mapema mwezi Mei mwaka huu

Kiwanda hicho ambacho ujenzi wake utagharimu shilingi 45,996,000 ikiwa

ni fedha kutoka Mpango wa Maendeleo ya kilimo(DADP’s) sasa kitajengwa

katika kijiji cha Iponjola kata ya Lufingo.

Baraza la madiwani wa halmashauri hiyo kupitia kikao chake lilipitisha

maamuzi ya kuhamishwa kwa mradi huo huku likisisitiza kuwa hali hiyo

huenda ikayakumba maeneo yote yanayoonekana kukithiri kwa migogoro.

Mwenyekiti wa halmashauri hiyo Meckson Mwakipunga alisema Vurugu za

kijiji cha Ilundo zilisababisha wadau kukosa imani ya eneo hilo kuwa

na Amani na Utulivu kiasi cha kupeleka mradi unaogharimu fedha nyingi.

Mwakipunga alisema miongoni mwa matukio yaliyowakatisha tama ya

kuwekeza katika kijiji hicho ni wanakijiji hao kuvunja jingo la

zahanati iliyokuwa mbioni kufunguliwa pamoja na ofisi ya serikali ya

kijiji cha kwa madai ya kutomtaka mwenyekiti wao.

“Kufuatia uharibifu wa mali za umma uliofanyika,kamati yangu ya

Fedha,Utawala na Mipango baada ya kuliangalia suala hilo kwa kina na

kutoridhika na mwenendo wa hali ya usalama unaoendelea mpaka sasa

kijijini hapo”

“Iliazimia mradi wa ujenzi wa kiwanda cha matundauliopangwa kuanza

utekelezaji 2011/2012 lakini ulikuwa bado usitishwe na badala yake

kiwanda hicho  kujengwa sehemu nyingine nje ya kijiji hicho” alisema.

Alitaja sifa za kijiji kulikohamishiwa mradi huo kuwa ni pamoja na

huduma ya maji ya kutosha,miundombini ya barabara ya uhakika kwa mwaka

mzima,umeme kwaajili ya kuendesha mitambo.

Sifa nyingine ni kufikika kwa urahisi na maeneo mengine kunakozalishwa

matunda na pia uwezekano wa upatikanaji wa eneo la kutosha kwaajili ya

ujenzi wa miundombinu muhimu ikiwemo majengo.